Работна виза за Германија — кои документи се преведуваат и по кој редослед

Барањето за работна виза се поднесува во Германската амбасада во Скопје, како национална виза (виза Д). Кои документи ќе ви требаат зависи од тоа по кој основ аплицирате — а од основот зависи и што мора да се преведе, и кога.

Три основи за работна виза

Blaue Karte EU е за лица со завршено високо образование и договор за работа со плата над праг што Германија го утврдува секоја година. Дипломата мора да биде германска или споредлива со германска. Споредливоста се проверува во базата anabin; ако вашиот универзитет или вашата диплома не се внесени таму, обично се бара Zeugnisbewertung — писмена оцена од ZAB (Zentralstelle für ausländisches Bildungswesen).

Виза за стручен кадар (Fachkraft) е за лица со призната стручна квалификација — диплома или завршено стручно образование споредливо со германско Ausbildung. Тука признавањето (Anerkennung) обично оди пред визата. Кај регулираните професии — медицински сестри, лекари, воспитувачи — е задолжително.

Westbalkanregelung е посебен режим за државјани на земјите од Западен Балкан, вклучително и на Северна Македонија. Потребна е конкретна понуда за работа од германски работодавач и согласност од Сојузната агенција за вработување (Bundesagentur für Arbeit); услов за квалификација или за јазик по правило нема. Постои годишна квота. Ова е најчестиот пат за Македонците што работат во градежништво, логистика, угостителство и производство.

Од овие три, само третиот не бара докажување на квалификација. Кај првите два, дипломата и нејзините придружни документи се јадрото на барањето.

Што бара амбасадата

Списокот го објавува амбасадата за секој вид виза и го менува без најава, па секогаш работете по актуелната верзија. Типично содржи:

• пасош и копии од релевантните страници
• пополнет формулар за национална виза
• биометриски фотографии
• договор за вработување или конкретна понуда за работа
• изјава на работодавачот за работниот однос (Erklärung zum Beschäftigungsverhältnis), пополнета и потпишана во Германија
• биографија (Lebenslauf), по можност на германски
• докази за квалификација — дипломи, свидетелства, уверенија
• докази за работно искуство
• здравствено осигурување за периодот до почетокот на работата
• уверение за неказнуваност, кај некои професии
• сертификат за германски јазик, само ако конкретниот основ или професија го бара

Дел од овие документи ги изготвува работодавачот на германски. Тие не се преведуваат. Се преведува она што е издадено на македонски.

Кои документи се преведуваат

Правилото е едноставно — сѐ што амбасадата треба да го прочита, а е на македонски. Документи на англиски најчесто се прифаќаат без превод, но проверете за секој поединечно.

Во практика од македонска страна најчесто се преведуваат:

• диплома и додаток на дипломата или уверение за положени испити
• свидетелства од средно образование, кај стручните професии и кај Ausbildung
• потврда за работен стаж од работодавач и преглед на осигурување од Фондот за пензиско и инвалидско осигурување
• уверение за неказнуваност од основниот суд, ако се бара
• лиценца за работа од соодветната комора, кај медицинските професии
• извод од матична книга на родените, кој амбасадата ретко го бара за самата виза, но затоа го бараат подоцнежните постапки во Германија

Преводот мора да биде заверен — со печат, штембил и изјава на постојан судски преведувач — и прицврстен со документот на кој се однесува. Што точно значи тоа објаснивме во водичот што е заверен превод, а за уверението од казнена евиденција имаме и посебен водич.

Една честа и непотребна грешка: се носи на превод и договорот за вработување што работодавачот го составил на германски. На амбасадата ѝ треба на германски — таков веќе е.

Редоследот што штеди време

1. Утврдете го основот. Blaue Karte, стручен кадар или Westbalkanregelung — тоа одредува сѐ што следува. Ако не сте сигурни, работодавачот или амбасадата ќе ви кажат.
2. Ако е потребно признавање, почнете со него. Постапката за Anerkennung е одделна, има свои документи и свој орган, а барањето за виза чека на нејзиниот исход. За Westbalkanregelung овој чекор го нема.
3. Соберете ги македонските документи во актуелна форма. Некои имаат рок — изводите и уверението за неказнуваност амбасадата обично ги сака не постари од шест месеци. Не преведувајте стар документ што ќе мора да го вадите повторно.
4. Преведете сѐ одеднаш. Така преводите се усогласени меѓу себе — истата транскрипција на името, истите термини за истите институции — и ги добивате во еден комплет.
5. Термин и поднесување. Носете оригинал, превод и по една обична копија од секој документ.
6. По пристигнувањето — пријава на адреса (Anmeldung) и дозвола за престој (Aufenthaltstitel) во службата за странци (Ausländerbehörde). Истите преводи ќе ви затребаат повторно, па чувајте ги.

Терминот во амбасадата често е потесното грло, не документите. Не чекајте термин за да почнете со собирање — обратното: соберете и преведете, па закажете, за да не ви истече некој документ додека чекате.

Германски јазик

За самата виза, ниту Blaue Karte ниту Westbalkanregelung по правило не бараат сертификат за јазик. Го бараат регулираните професии — таму нивото е дел од признавањето, најчесто B1 или B2, зависно од професијата и од покраината. Кое ниво е за што, пишуваме во посебен водич, а ако ви треба подготовка, нудиме и часови по германски.

Каде најчесто запнува

• Диплома без транскрипт. Дипломата кажува што сте завршиле; уверението за положени испити кажува што сте учеле. Германските органи ги сакаат двете.
• Различно напишано име. Во преводите името се транскрибира како во пасошот, не како на некоја стара бланка — ако веќе имате документи со поинаква латинична форма, кажете ни.
• Истечен документ. Извод преведен пред една година, па заборавен — амбасадата бара нов, и преводот се повторува.
• Превод од неовластено лице. Превод без заверка од постојан судски преведувач не се прифаќа, колку и да е добар. Амбасадата во Скопје по правило ги прифаќа преводите на македонските судски преведувачи; дали некој орган внатре во Германија бара преведувач заколнат таму, прашајте го однапред.