Спојување на семејство во Германија (Familiennachzug) — документи и постапка

Familiennachzug е постапката со која сопружник, деца или родители се приклучуваат кон лице што веќе живее во Германија. Постапката има две страни: подносителот во Македонија, кој бара виза во амбасадата во Скопје, и лицето во Германија, чиј статус и услови одлучуваат дали визата воопшто е можна. Документите доаѓаат од двете страни, а се преведуваат само од едната.

Кој може да дојде

• Сопружник (Ehegattennachzug) — бракот мора да биде правно валиден и документиран, а двајцата по правило полнолетни.
• Малолетни деца (Kindernachzug) — со уредено старателство.
• Родител на малолетно дете што е германски државјанин или живее во Германија — родител со право на грижа.
• Други роднини — само во исклучителни случаи на особена тежина; тоа се поединечни одлуки, не редовна постапка.

Од што зависи одобрувањето

Тежиштето е кај лицето во Германија. Тоа мора да има дозвола за престој (Aufenthaltstitel) што дозволува спојување — германско државјанство, Niederlassungserlaubnis, Blaue Karte EU, Aufenthaltserlaubnis за вработување и слично — и да докаже обезбедена егзистенција (gesicherter Lebensunterhalt), доволен станбен простор (ausreichender Wohnraum) и здравствено осигурување за семејството.

Условите не се исти за сите. Носителите на Blaue Karte и германските државјани имаат олеснувања; за други категории условите се построги. Кои правила важат за вашиот случај — прашајте ја службата за странци (Ausländerbehörde) во градот каде што живее семејството, уште пред да се закаже терминот во амбасадата.

Германски јазик

Сопружникот по правило треба да покаже основно познавање на германски — ниво A1 — со сертификат од Goethe-Institut, ÖSD или telc. Постојат исклучоци: меѓу другото за сопружници на носители на Blaue Karte EU, а во одредени случаи и кога учењето не е разумно можно. Дали исклучокот важи за вас, одлучува амбасадата.

За помали деца не се бара јазик. За постари малолетници правилата се поинакви и подетални — проверете ги посебно.

Ако ви треба A1, часовите ги подготвуваме токму за форматот на испитот, а во водичот за јазични нивоа објаснуваме што кое ниво значи во практика.

Документи од страната на подносителот

Од Македонија амбасадата типично бара:

• пасош
• пополнет формулар и биометриски фотографии
• извод од матична книга на венчаните
• извод од матична книга на родените за секое лице што патува
• уверение за државјанство, кога го бараат
• сертификат A1, кај сопружници
• за деца: изјава за согласност од другиот родител, заверена кај нотар, ако тој родител останува во Македонија; решение за старателство, ако родителите се разведени; понекогаш и свидетелства од училиште
• ако некој од сопружниците претходно бил во брак: пресуда за развод со клаузула за правосилност, или извод од матична книга на умрените
• уверение за неказнуваност, кај некои категории

Кај разводите има дополнителна замка: развод изречен во Македонија понекогаш мора формално да биде признаен во Германија пред новиот брак да произведе дејство таму. Дали тоа важи за вас, кажува матичната служба (Standesamt) или службата за странци.

Документи од страната на лицето во Германија

• копија од пасош и од Aufenthaltstitel, или германска лична карта
• договор за вработување и последните платни листи (Gehaltsabrechnungen)
• договор за закуп (Mietvertrag) и потврда за станбениот простор или пријава на адреса (Meldebescheinigung)
• доказ за здравствено осигурување
• понекогаш изјава за преземање на трошоци (Verpflichtungserklärung)

Овие документи се на германски и не се преведуваат. Тие се праќаат од Германија во Македонија — по пошта или скенирано — и се приложуваат кон барањето.

Што се преведува

Се преведува сѐ што е издадено на македонски: изводите, судските пресуди, нотарските изјави, решенијата за старателство, уверенијата. Преводот е заверен и прицврстен со документот — што значи тоа, пишуваме во водичот што е заверен превод.

Две практични напомени. Прво, ако изводот е издаден на меѓународен повеќејазичен образец, прашајте дали воопшто е потребен превод — некои органи го прифаќаат така. Второ, изводите се бараат актуелни, најчесто не постари од шест месеци, па преводот се нарачува откако ќе го извадите новиот извод, не од оној што стои дома со години.

Најчестата грешка ја прави сопружникот во Германија: испраќа преводи од старите изводи што ги има кај себе. Амбасадата бара нов извод, преводот се повторува, а терминот е веќе закажан. Прво нов извод, па превод.

Дали е потребна дополнителна заверка на самите македонски документи, проверете кај амбасадата или органот што ќе ги прими.

Тек на постапката

1. Лицето во Германија ги проверува условите — статус, приходи, стан — по потреба со службата за странци.
2. Подносителот закажува термин во амбасадата, ги собира документите и, кај сопружници, го полага A1.
3. Се поднесува комплетот: оригинали, заверени преводи и копии, заедно со документите од Германија.
4. Амбасадата го проследува барањето до службата за странци по местото на живеење на семејството, чија согласност е потребна. Во оваа фаза се вообичаени дополнителни барања.
5. По издавањето на визата — влез во Германија, пријава на адреса и поднесување за Aufenthaltserlaubnis во службата за странци. Истите документи и преводи се потребни повторно.

Ако бракот дури треба да се склучи — во Германија или во Македонија — документите за тоа ги опишавме во водичот за склучување брак, а за изводите посебно во водичот за извод од матична книга на родените.