Студирање во Германија — документи за uni-assist, упис и студентска виза

Патот до студии во Германија има три станици, со три различни приматели: универзитетот или uni-assist при аплицирањето, амбасадата при барањето виза и повторно универзитетот со службата за странци при уписот. Низ сите три кружат истите македонски документи. Затоа се преведуваат еднаш, темелно, и се чуваат заедно.

Прво прашање: дали матурата е доволна

Секој кандидат мора да има право на пристап до високо образование (Hochschulzugangsberechtigung). Дали македонската државна матура дава директен пристап до германски универзитет, или прво се оди на подготовка во Studienkolleg со завршен испит (Feststellungsprüfung), се утврдува при оценката на документите — и зависи од видот на средното училиште, од положените предмети и од саканата насока. Веќе завршени семестри на македонски факултет можат да го променат исходот.

Не претпоставувајте. Проверете во базата anabin или прашајте го универзитетот пред да аплицирате, зашто одговорот одлучува кои документи се потребни.

За мастер студии прашањето е поедноставно — се оценува дипломата за прв циклус, по истиот принцип што го опишавме во водичот за признавање на диплома.

Каде се аплицира

Многу германски универзитети ги примаат странските апликации преку uni-assist, централна служба што ги проверува документите и проследува оценка до универзитетот; за некои универзитети издава и претходна оценка (Vorprüfungsdokumentation, VPD) што потоа се приложува кон директна апликација. Други универзитети обработуваат сами. Кој од двата модели важи, пишува на страницата на самиот универзитет, и не е исто за сите насоки.

И uni-assist и универзитетите имаат свои рокови и наплаќаат надомест за обработка. Роковите за зимски и летен семестар се различни и не се поместуваат.

Документи за аплицирање

Типичниот комплет за прв циклус:

• свидетелства за секоја година од средното образование
• диплома за положена државна матура или свидетелство за завршено средно образование
• уверение за положени испити и потврда за студирање, ако сте студирале во Македонија
• сертификат за јазик — за студии на германски TestDaF, DSH, Goethe или telc на нивото што го бара програмата; за студии на англиски IELTS или TOEFL
• биографија и, каде што се бара, мотивационо писмо
• копија од пасош

За втор циклус наместо свидетелствата се поднесува дипломата со додатокот на дипломата и уверението за положени испити.

Свидетелствата за четирите години се четири одделни документи — секое со оценки, печати и потписи. По обем тоа е најголемиот дел од преводот за студии, не дипломата. Планирајте го така и временски и финансиски.

Копии и преводи

uni-assist и универзитетите по правило бараат заверена копија на оригиналот и заверен превод за секој документ што не е на германски или англиски. Обична фотокопија и обичен превод се одбиваат, а одбиената апликација не чека следниот рок.

Две работи вреди да ги проверите пред да нарачате. Прво — дали англиската верзија на уверението за положени испити или на додатокот на дипломата, ако факултетот ја издава, се прифаќа без превод. Второ — дали приемот е само електронски, со скенирани документи, или се бара и поштенска достава на хартија; праксата се менува од универзитет до универзитет.

Транскрипцијата на името во преводите го следи пасошот. Ако веќе имате документи со поинаку напишано име на латиница, кажете ни однапред — на универзитетот му треба еден човек, не двајца. Што содржи заверката, пишуваме во водичот што е заверен превод.

Редослед што штеди време

1. Проверете право на пристап и модел на аплицирање — uni-assist или директно.
2. Побарајте ги документите од училиштето и од факултетот. Дупликат на свидетелство или уверение со сите години се вади подолго отколку што се мисли.
3. Јазичен сертификат — испитите имаат свои термини, независни од роковите за аплицирање, и резултатот се чека.
4. Заверени копии и заверени преводи, во еден комплет што ќе го употребите кај сите три приматели.
5. Апликација, па веднаш термин во амбасадата — не по приемот.

Потоа: студентска виза

Со писмото за прием (Zulassungsbescheid) — или со прием во Studienkolleg, условен прием или потврда за јазичен курс — се бара национална виза за студии во амбасадата во Скопје. Типично се бара:

• писмо за прием
• доказ за финансирање — најчесто блокирана сметка (Sperrkonto) со износ што Германија го утврдува секоја година, или изјава за преземање трошоци (Verpflichtungserklärung), или стипендија
• здравствено осигурување
• сертификат за јазик
• биографија и мотивација
• пасош и фотографии
• истите образовни документи — со истите преводи

Терминот во амбасадата се закажува однапред и е ограничен, па барањето за виза се планира уште при аплицирањето, не по приемот.

По пристигнувањето

Пријава на адреса (Anmeldung), упис на универзитетот (Immatrikulation) со оригиналите на увид, здравствено осигурување, па дозвола за престој заради студии (Aufenthaltserlaubnis zum Studium) во службата за странци (Ausländerbehörde). Носете ги оригиналите и преводите заедно, во едно досие; секој од овие органи ќе побара да ги види.

Ausbildung како алтернатива

Германија нуди и дуално стручно образование — Ausbildung — со договор со претпријатие и училишен дел. Тоа е одделен пат со своја виза, за која обично се бара сертификат за германски јазик и преведени свидетелства од средно образование. Јазичните нивоа што се бараат за виза ги објаснивме во водичот кое ниво германски за виза, а подготовката за самиот испит ја нудиме и во часовите.